Plantun de Prouvènço

Pèr coumpara dos planto d'encò nostre

Hordeum marinum & Plumbago europaea

Estranglo-bèsti

Hordeum marinum

Poaceae Graminaceae

Àutri noum : Estranglo-chivau, Trauco-sa, Sauto-roubin.

Nom en français : Orge marine.

Descripcioun :
L'òrdi-marin èi coumun dins li prado salado gourgado d'aigo en ivèr. Flouris la primo e l'estiéu, la planto es un pau verdalo. Se destrìo de l'estranglo-chivau, proun coumuno d'en pertout, que sis espigueto toumbon un cop maduro. Èi peréu uno planto de l'an au contre de Hordeum secalinum. Verifica peréu que i'ague ges d'auriheto sus la fueio (Hordeum murinum). La subsp. presentado eici, èi marinum (espigueto esterlo de coustat emé de glumo diferènto).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Hordeum
Famiho : Poaceae
Famiho classico : Graminaceae
Tribu : Triticeae
Ordre : Poales

Coulour de la flour : Verdo
Petalo : ges
Ø (o loungour) enflourejado : 2,5 à 4 cm
Flourido : Printèms - Estiéu

Sòu : Na
Autour basso e auto : Pancaro entresigna
Aparado : Noun
Remarco : Planto de coustiero
Mai à avoust

Liò : Prado salado
Estànci : Termoumediterran à Mesoumediterran
Couroulougi : Éurimediterrano
Ref. sc. : Hordeum marinum Huds., 1778

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.